Sindikata e Policisë së Kosovës, e përfaqësuar nga Nënkryetari z. Avdi Hoti dhe Nënkryetarja znj. Edita Azemi, shprehin kënaqësinë dhe mbeshtetjen për përurimin e Stacionit të ri policor në Mamushë. Ky investim përfaqëson një hap të rëndësishëm drejt përmirësimit të kushteve të punës për zyrtarët policorë dhe garantimit të sigurisë për qytetarët e kësaj komune.
Në ceremoninë e përurimit ishin të pranishëm Drejtori i Përgjithshëm i Policisë së Kosovës, Kolonel Gazmend Hoxha, së bashku me bashkëpunëtorët e tij, Kryetari i Komunës së Mamushës, z. Abdulhadi Krasniq, Komandanti i Stacionit të ri policor, Toger Enis Orqusha, si dhe përfaqësues të shumtë të Policisë së Kosovës dhe komunitetit lokal.
Stacioni i ri policor është ndërtuar me standardet më të larta moderne, duke krijuar një mjedis pune të denjë dhe funksional për zyrtarët policorë. Ky projekt shpreh përkushtimin e përbashkët të institucioneve dhe Sindikatës për të forcuar infrastrukturën policore, me qëllim të ofrimit të shërbimeve më cilësore për qytetarët dhe përmirësimit të mirëqenies së zyrtarëve policorë.
Sindikata e Policisë së Kosovës mbetet e përkushtuar për të promovuar dhe mbrojtur interesat e zyrtarëve policorë, duke punuar pandërprerë për përmirësimin e kushteve të punës dhe krijimin e mjediseve që nxisin efikasitet dhe profesionalizëm. Ky përurim është një dëshmi e qartë e përpjekjeve tona të përbashkëta për një polici më të fortë dhe një siguri më të madhe për qytetarët e Kosovës.
Sindikata e Policisë së Kosovës – Zëri i Policëve, për një Kosovë më të Sigurt!
