Sarajevë, Dhjetor 2024 – Në Sarajevë u zhvillua takimi i parë zyrtar ndërmjet Sindikatës së Policisë së Kosovës dhe Unionit të Sindikatave të Pavarura të Policisë të Federatës së Bosnjës dhe Hercegovinës.
Në këtë takim morën pjesë nënkryetari i Sindikatës së Policisë së Kosovës, z. Avdi Hoti, dhe nënkryetarja e sindikatës, znj. Edita Azemi.
Ky takim shënoi një hap të rëndësishëm drejt forcimit të bashkëpunimit ndërmjet dy sindikatave dhe avancimit të të drejtave dhe mirëqenies së policëve në të dyja vendet. Në fokus të diskutimeve ishin ndarja e përvojave dhe praktikave të mira, identifikimi i sfidave të përbashkëta dhe mundësitë për bashkëpunim të mëtejshëm në çështje të rëndësishme për komunitetet e policisë.
Në kuadër të këtij bashkëpunimi, u mbajt edhe një seminar me temën “Zbatimi i Ligjit për Mbrojtjen e të Dhënave të Fshehta në Organet e Punëve të Brendshme”, ku përfaqësuesit e të dy sindikatave ndanë përvoja dhe ekspertiza në zbatimin e këtij ligji të rëndësishëm. Seminari theksoi rëndësinë e mbrojtjes së të dhënave konfidenciale për të siguruar integritetin dhe efikasitetin në punën e policisë.
Sindikata e Policisë së Kosovës mbetet e përkushtuar për të ndërtuar ura bashkëpunimi me vendet e rajonit dhe të Evropës, duke vazhduar angazhimin e saj për avancimin e të drejtave dhe përmirësimin e kushteve të punës për të gjithë anëtarët e saj. Forcimi i lidhjeve me sindikata homologe në rajon dhe më gjerë mbetet një prioritet i saj.
