Me mbështetjen e Sindikatës së Policisë së Kosovës në realizimin e projektit të donacionit për Zyrën e Seancave Psikologjike, Drejtoria e Shërbimeve Shëndetësore – Sektori i Psikologjisë priti sot në një takim përfaqësuesit e institucioneve dhe organizatave që kontribuuan në funksionalizimin e këtij projekti.
Në takim morën pjesë përfaqësuesit e Fondacionit GNTC, kryetari i Bashkësisë Islame të Prishtinës, drejtori i Shoqatës Bamirëse “Bereqeti” dhe përfaqësues të Policisë së Komunitetit.
Po ashtu, në takim morën pjesë kryetari dhe nënkryetarja e Sindikatës së Policisë së Kosovës, si dhe përfaqësues të menaxhmentit policor, të cilët kanë mbështetur këtë iniciativë me rëndësi për avancimin e shërbimeve psikologjike dhe mirëqenien e zyrtarëve policorë.
Takimi u mbajt në ambientet e Drejtorisë së Shërbimeve Shëndetësore, përkatësisht në Zyrën e Seancave Psikologjike, e cila është realizuar përmes donacionit të Fondacionit GNTC, të ndërmjetësuar nga Bashkësia Islame e Prishtinës dhe Shoqata Bamirëse “Bereqeti”.
Me këtë rast, në shenjë mirënjohjeje dhe vlerësimi për kontributin e dhënë në realizimin e këtij projekti, menaxhmenti i Policisë së Kosovës ndau letra falënderimi për përfaqësuesit e institucioneve dhe organizatave kontribuuese.
Gjatë takimit u vlerësua lart bashkëpunimi ndërinstitucional dhe mbështetja e partnerëve në krijimin e kushteve më të mira për ofrimin e shërbimeve profesionale psikologjike, duke theksuar rëndësinë e investimit në shëndetin mendor dhe mirëqenien e zyrtarëve policorë.
Pjesëmarrësit shprehën gatishmërinë për vazhdimin e bashkëpunimit edhe në të ardhmen, me qëllim të mbështetjes së projekteve që ndikojnë drejtpërdrejt në përmirësimin e kushteve të punës dhe fuqizimin e kapaciteteve të Policisë së Kosovës.
Sindikata e Policisë së Kosovës mbetet e përkushtuar në mbështetjen e iniciativave dhe projekteve që kontribuojnë në përmirësimin e kushteve të punës, avancimin e mirëqenies dhe ruajtjen e shëndetit fizik e mendor të zyrtarëve policorë. Në këtë drejtim, Sindikata do të vazhdojë të bashkëpunojë me institucionet dhe partnerët për realizimin e projekteve me interes për pjesëtarët e Policisë së Kosovës.
