Kryetari i Sindikatës së Policisë së Kosovës, z. Avdi Hoti, i shoqëruar nga nënkryetarja e sindikatës, znj. Edita Azemi, kryetarja e Rajonit të Prishtinës – DRP Prishtinë, znj. Luljeta Statovci, si dhe z. Besmir Ibrahimi, ekspert i komunikimit nga Policia e Kantonit të Gjenevës në Zvicër, realizuan një vizitë mbështetëse dhe motivuese për gjeneratën 63 të kadetëve policorë në Akademinë e Kosovës për Siguri Publike.
Në kuadër të kësaj vizite, përfaqësuesit sindikalë u pritën nga stafi i Akademisë, ndërsa para kadetëve u mbajt një fjalim motivues dhe inkurajues nga kryetari i Sindikatës së Policisë së Kosovës, z. Avdi Hoti, ku u theksua rëndësia e përkushtimit, disiplinës dhe profesionalizmit në rrugëtimin e tyre drejt shërbimit në Policinë e Kosovës.
Me këtë rast, kryetari i Sindikatës së Policisë së Kosovës, z. Avdi Hoti, mbajti një fjalim para kadetëve të rinj, ku theksoi rëndësinë dhe përgjegjësinë që bart uniforma policore.
“Ju po hyni në një profesion që kërkon integritet, guxim dhe përgjegjësi të lartë ndaj shtetit dhe qytetarëve tanë. Uniforma që do të vishni nuk është vetëm një detyrë, por është nder, përgjegjësi dhe besim i qytetarëve ndaj jush”, u shpreh z. Hoti.
Ai theksoi se Sindikata e Policisë së Kosovës do të jetë gjithmonë pranë çdo zyrtari policor, në mbrojtje të të drejtave profesionale dhe sociale të tyre, duke potencuar se sindikata mbetet zë i fuqishëm për drejtësi, dinjitet dhe kushte më të mira pune për të gjithë pjesëtarët e Policisë së Kosovës.
Gjithashtu, kryetari Hoti i ftoi kadetët e rinj që të bëhen pjesë e Sindikatës së Policisë së Kosovës, duke theksuar se uniteti dhe solidariteti janë themeli i fuqisë së përbashkët sindikale.
“Qëndroni të bashkuar, ndihmoni njëri-tjetrin dhe gjithmonë ngrini zërin për të drejtat tuaja. Bashkimi ynë është forca jonë”, theksoi ai para kadetëve.
Në fund të fjalës së tij, z. Hoti uroi kadetët për suksese në rrugëtimin e tyre profesional, duke i inkurajuar që detyrën policore ta ushtrojnë me ndershmëri, profesionalizëm dhe përkushtim në shërbim të qytetarëve dhe atdheut.
Po ashtu, gjatë kësaj vizite, z. Besmir Ibrahimi, ekspert i komunikimit nga Policia e Kantonit të Gjenevës në Zvicër, zhvilloi një bashkëbisedim me kadetët në ambientet e klasës lidhur me rëndësinë e komunikimit profesional, etikës në komunikim dhe rolin e tij në ushtrimin e detyrës policore.
Sindika e Policisë së Kosovës mbetet e përkushtuar në mbështetjen e brezave të rinj të policëve dhe në avancimin e të drejtave dhe mirëqenies së tyre profesionale.
