Kryetari i Sindikatës së Policisë së Kosovës, z. Avdi Hoti, së bashku me nënkryetaren, znj. Edita Azemi, kanë pritur në takim kryetarin e Federatës së Sindikatave të Pavarura të Elektrokosovës, z. Ahmet Hyseni, bashkë me nënkryetaren, si dhe kryetaren e Sindikatës së IPKO-së, znj. Dea Gjinali, e shoqëruar nga nënkryetarja.
Takimi u zhvillua në frymën e bashkëpunimit ndërinstitucional dhe me qëllim fuqizimin e dialogut social ndërmjet sindikatave. Përfaqësuesit e FSPPE-së dhe Sindikatës së IPKO-së uruan kryesinë e re të Sindikatës së Policisë së Kosovës për zgjedhjen dhe marrjen e detyrave të reja, duke vlerësuar rëndësinë e vazhdimësisë së punës sindikale në mbrojtje të të drejtave të punëtorëve.
Gjatë diskutimit u theksua nevoja për thellimin e bashkëpunimit, koordinimin e aktiviteteve të përbashkëta dhe iniciimin e projekteve që synojnë avancimin e mirëqenies së anëtarëve të sindikatave përkatëse. Palët u shprehën të gatshme të ndërtojnë një partneritet të qëndrueshëm dhe efikas, në funksion të forcimit të zërit sindikal në vend.
Sindikata e Policisë së Kosovës vlerëson lart gatishmërinë e palëve për bashkëpunim dhe mbetet e përkushtuar në zhvillimin e iniciativave që i shërbejnë komunitetit sindikal dhe interesave të punonjësve të Policisë së Kosovës.
