Sot më 18.09.2021 ka filluar punëtoria “Sigurimi shëndetësor, aksidental dhe jetësor – kur do të jetësohet?” e cila po organizohet nga Sindikata e Policisë së Kosovës dhe fondacioni “Friedrich erbert Stiftung” në partneritet me sindikatën dhe shoqërinë civile. Në këtë punëtori të pranishëm ishin përfaqësues nga kryesia ekzekutive e Sindikatës së Policisë së Kosovës, përfaqësues nga Sindikata e Shqipërisë, Maqedonisë së Veriut, si dhe anëtarë dhe përfaqësues të sindikatës së PK-së nga rajonet policore të Kosovës.
Me një fjalë rasti, zonja Kamberi i falënderoi të pranishmit për pjesëmarrje si dhe u dëshiroi që kjo punëtori të jetë një pikënisje e punës së kamotshme që Sindikata e PK-së në vazhdimësi është duke bërë përpjekje që sigurimi shëndetësor, aksidental dhe jetësor të fuqizohet sa më parë edhe pse Ligji për Sigurimin Shëndetësor është aprovuar nga Kuvendi i Kosovës më 2014 dhe ende nuk është në zbatim.
Policia e Kosovës nuk ka sigurim shëndetësor, aksidental dhe jetësor, po ashtu nuk është rregulluar me ligj pensionimi i parakohshëm si dhe ai invalidor. Me gjithë premtimet, asnjë qeveri deri më tani nuk e ka jetësuar këtë ligj. Do të ishte mirë që qeveria ta zgjidhte problemin e këtyre kategorive derisa nuk zgjidhet problemi në tërësi, theksoi Kamberi. Ndërsa nga Sindikata e Policisë së Maqedonas së Veriut u foli nënkryetari i sindikatës, zoti Tome Vasev, i cili prezantoi përvojën dhe mënyrën e zgjidhjes së këtyre problemeve që jo vetëm për Policinë e Kosovës por është me rëndësi të madhe edhe për politikëbërësit.
Në fund, kryetarja e Sindikatës së PK-së, znj. Kamberi i falënderoi të pranishmit për pjesëmarrje dhe diskutim, në veçanti zotin Vasev i cili prezantoi programin e sindikatës së Maqedonisë së Veriut, i cili është shumë i mirëseardhur dhe i dobishëm edhe për Policinë e Kosovës.
Kosova duhet ta ketë sigurimin shëndetësor dhe jetësor, në partneritet si rajoni dhe vendet e tjera te botës.
Punëtoria i ka përmbyllur punimet duke shpresuar që ligji të hyjë sa më parë në fuqi.
