Sot me datë 01.02.2024, Kryetari i Sindikatës së Policisë Ime Zeqiri dhe Kryetari i Shoqatës Sindikale të Drejtorisë së Përgjithshme të Policisë Besim Krasniqi, kanë mbajtur një takim pune me Njësitë e Specializuara të Policisë së Kosovës, në Kampin “Enver Zymeri” në Mitrovicë.
Në këtë takim kanë marrë pjesë përfaqësuesit e njësive të: NJSO-së, NJSI-së, NJTME-së, NJMA-së dhe K-9.
Qëllim i takimit ishte koordinimi dhe përfaqësimi sa më i mirë i të drejtave të të gjithë punonjësve të Policisë së Kosovës.
Kryetari i Sindikatës fillimisht paraqiti veprimet dhe punën e deritashme të Sindikatës dhe planifikimin në të ardhmen sa i përket mbrojtjes së të drejtave të pjesëtarëve të policisë dhe realizimit të kërkesave.
Në këtë takim, nga të pranishmit, janë diskutuar kushtet e punës, pajisjet, mirëqenia, shkelja e të drejtave ligjore të punëtorëve, heqja e disa kufizimeve të paarsyeshme, kompetencat e njësive dhe trajtimi i dinjitetshëm për të gjithë pjesëtarët e policisë.
Nga përfaqësuesit e këtyre njësive është kërkuar që Sindikata të luaj rol vendimtar në përfaqësimin e të drejtave të tyre, qoftë në kushte dhe mirëqenie , qoftë në rregullimin e disa çështjeve administrative si te Udhëzimet dhe Rregulloret e brendshme. Po ashtu kërkesë e veçantë ishte reflektimi, brenda muajit Shkurt, për realizimin e kërkesave të paraqitura në protestën e fundit, me qëllim që të mos detyrohemi që të fillojmë pësëri me protesta.
Kryetari i Sindikatës është zotuar se në mënyrë të pa anshme dhe pa ndikim nga askush do të përfaqësoj të gjithë punonjësit e policisë duke insistuar që të drejtat dhe kërkesat e tyre të realizohet me dialog dhe mirëkuptim nga organet përkatëse.
