MARRËVESHJE BASHKËPUNIMI NDËRMJET SINDIKATËS SË POLICISË SË KOSOVËS DHE KOLEGJIT AAB

Sindikata e Policisë së Kosovës (SPK) dhe Kolegji AAB kanë nënshkruar sot një Marrëveshje Bashkëpunimi, e cila synon fuqizimin e bashkëpunimit në fushën e arsimit të lartë, zhvillimit profesional dhe mbështetjes akademike për anëtarët e Sindikatës së Policisë së Kosovës dhe familjarët e tyre.

Marrëveshja u nënshkrua nga Kryetari i Sindikatës së Policisë së Kosovës, Avdi Hoti, së bashku me nënkryetaren, Edita Azemi, si dhe nga Rektori i Kolegjit AAB, Blerim Olluri, dhe Pro-Rektorja për Marrëdhënie Ndërkombëtare dhe Bashkëpunim, Venera Llunji, duke krijuar një partneritet të rëndësishëm që do të kontribuojë në ngritjen e kapaciteteve profesionale dhe akademike të pjesëtarëve të Policisë së Kosovës.

Në kuadër të kësaj marrëveshjeje, Kolegji AAB do të ofrojë kushte të favorshme studimi për anëtarët e SPK-së, përfshirë zbritje në tarifat e studimeve, mundësi pagese me këste, lehtësime në regjistrim për programet Bachelor dhe Master, si dhe mbështetje akademike dhe këshillimore gjatë procesit të studimeve.

Po ashtu, marrëveshja parasheh bashkëpunim në organizimin e trajnimeve profesionale, seminareve, konferencave shkencore, certifikimeve profesionale dhe aktiviteteve të përbashkëta që kanë për qëllim avancimin profesional dhe zhvillimin e vazhdueshëm të anëtarëve të Policisë së Kosovës.

Sindikata e Policisë së Kosovës do të angazhohet në promovimin e kësaj marrëveshjeje tek anëtarësia e saj dhe në koordinimin e aktiviteteve të përbashkëta me Kolegjin AAB, me qëllim që përfitimet e saj të jenë sa më të qasshme për të gjithë pjesëtarët e interesuar.

Ky bashkëpunim përfaqëson një hap të rëndësishëm drejt krijimit të mundësive të reja akademike dhe profesionale për anëtarët e Sindikatës së Policisë së Kosovës, duke kontribuar në ngritjen e standardeve profesionale dhe në zhvillimin e vazhdueshëm të burimeve njerëzore në Policinë e Kosovës.

Për më shumë informacione rreth shërbimeve të ofruara dhe kushteve të kësaj marrëveshjeje, ju lutemi vizitoni faqen tonë zyrtare në rubrikën “Marrëveshjet”. Gjithashtu, mund të gjeni edhe lidhjen (linkun) e Kolegjit AAB, ku janë të publikuara programet e studimit, ofertat akademike, informacionet për regjistrim, si dhe mundësitë e zhvillimit profesional dhe akademik në dispozicion të anëtarëve të Sindikatës së Policisë së Kosovës dhe familjarëve të tyre.

Sindikata e Policisë së Kosovës mbetet e përkushtuar në krijimin e partneriteteve që sjellin përfitime konkrete për anëtarët e Sindikatës së Policisë së Kosovës dhe familjarët e tyre, duke investuar në arsim, ngritje profesionale dhe zhvillim të vazhdueshëm të kapaciteteve njerëzore.