Kryetari i Sindikatës së Policisë së Kosovës, së bashku me bashkëpunëtorët e tij, realizoi një vizitë zyrtare në Drejtorinë Rajonale Mitrovicë Jug, ku u prit nga drejtoresha e kësaj drejtorie, Kolonel Afërdita Mikullovci.
Gjatë takimit u diskutua për aktivitetet sindikale, sfidat me të cilat përballen zyrtarët policorë, si dhe për prioritetet dhe objektivat e sindikatës. Vëmendje e veçantë iu kushtua çështjeve që lidhen me mirëqenien e zyrtarëve policorë, përfshirë nevojën për avancimin e të drejtave të tyre dhe përmirësimin e kushteve të punës.
Takimi u zhvillua në frymë bashkëpunimi dhe mirëkuptimi, me fokus në forcimin e solidaritetit dhe përfaqësimit sindikal. Kolonel Mikullovci vlerësoi rolin e Sindikatës së Policisë së Kosovës në mbrojtjen e interesave të zyrtarëve policorë dhe shprehu gatishmërinë për bashkëpunim të vazhdueshëm në funksion të avancimit të çështjeve me interes të përbashkët.
Sindikata e Policisë së Kosovës mbetet e përkushtuar në misionin e saj për mbrojtjen dhe promovimin e të drejtave të anëtarëve, duke bashkëpunuar me të gjitha strukturat relevante për të siguruar kushte më të mira pune, trajtim dinjitoz dhe një të ardhme më të sigurt për zyrtarët policorë.
