Sindikata e Policisë së Kosovës, duke i përkujtuar dhe nderuar 26 zyrtarët policorë të rënë në kryerje të detyrës zyrtare, të njohur si “Heronjtë e Kosovës”, edhe këtë vit organizoi turneun tradicional sportiv në disiplina të ndryshme, i cili u mbajt në rajonin e Gjakovës. Këtë vit, turneu iu kushtua heroit, rreshterit Afrim Bunjaku.
Në këtë organizim sindikal, me fjalë rasti iu drejtuan të pranishmëve z.Enver Dugolli, zëvendësministër i Punëve të Brendshme, nënkolonel Arbnesh Ajvazi, drejtor i Departamentit të Rendit Publik, z. Avdi Hoti, kryetar i Sindikatës së Policisë së Kosovës, znj. Nita Efendia Brovina, drejtoreshë e Kulturës, Rinisë dhe Sportit në Komunën e Gjakovës, si dhe Massimo Denarier, kryetar i CESP-it.
Në fjalimet e tyre, ata vlerësuan lart kontributin e zyrtarëve policorë, të cilët përfaqësojnë shembullin e përkushtimit në shërbim dhe të mbrojtjes së vendit. Gjithashtu, vlerësuan organizimin e turneut dhe përkushtimin e Sindikatës për të nderuar e përkujtuar heronjtë e Kosovës.
Këtë ngjarje sportive e nderuan me pjesëmarrjen e tyre edhe përfaqësues të sindikatave të vendeve mike, përkatësisht nga Shqipëria, Mali i Zi, Maqedonia e Veriut, Kroacia, Bosnja dhe Hercegovina, Sllovenia, Lituania, Qiproja dhe Polonia. Në këtë organizim morën pjesë edhe familjarë të zyrtarëve policorë të rënë në kryerje të detyrës, si dhe përfaqësues të menaxhmentit policor nga niveli qendror dhe ai lokal.
Garat sportive u hapën zyrtarisht nga kryetari i Sindikatës së Policisë së Kosovës, Avdi Hoti, së bashku me djalin e heroit Afrim Bunjaku.
Në shenjë falënderimi për pjesëmarrjen dhe bashkëpunimin e ndërsjellë, përfaqësuesve të shteteve pjesëmarrëse iu ndanë pllakata mirënjohjeje.
Sindikata e Policisë së Kosovës mbetet e përkushtuar që të vazhdojë mbështetjen e zyrtarëve policorë në aspektin sindikal, duke mos i harruar asnjëherë familjarët e policëve të rënë në kryerje të detyrës. Ata dhanë më të shtrenjtën, jetën e tyre, në shërbim të vendit dhe qytetarëve të Republikës së Kosovës.