Sot, në ambientet e zyrës së Sindikatës së Policisë së Kosovës (SPK), kryesia ekzekutive priti në vizitë zyrtare Ambasadorin për Paqe, z. Tahir Shabani, përfaqësues i Institutit për Bashkëpunim dhe Zhvillim (Institut de Coopération et Développement – ICD).
Me këtë rast, Ambasadori Shabani përcolli urimet e tij për kryetarin e sapozgjedhur të Sindikatës së Policisë së Kosovës, z. Avdi Hoti, si dhe për znj. Edita Azemi, e zgjedhur në postin e nënkryetares, pas zgjedhjeve të mbajtura në muajin maj 2025.
Gjatë takimit u diskutua për mundësitë konkrete të bashkëpunimit të ndërsjellë, me qëllim të fuqizimit të rolit të Sindikatës së Policisë së Kosovës në nivel ndërkombëtar. Ambasadori Shabani theksoi gatishmërinë e tij për të mbështetur iniciativat e SPK-së dhe bëri të ditur se tashmë janë përgatitur takime të rëndësishme në Zvicër, në të cilat përfaqësues të Sindikatës së Policisë së Kosovës do të marrin pjesë, me synim krijimin e lidhjeve të reja me sindikata dhe institucione ndërkombëtare.
Po ashtu, në fokus të diskutimeve ishin mundësitë për trajnime profesionale për zyrtarët policorë dhe përfaqësuesit sindikalë, promovimi i Sindikatës në platformat ndërkombëtare, si dhe thellimi i bashkëpunimit me sindikata të shteteve si Franca dhe Zvicra.
Ky takim shënon një hap të rëndësishëm në drejtim të forcimit të angazhimeve ndërkombëtare të Sindikatës së Policisë së Kosovës, me qëllim avancimin e të drejtave dhe kushteve të punës për zyrtarët policorë në Republikën e Kosovës.
