Sindikata e Policisë së Kosovës realizoi për herë të parë një vizitë zyrtare në Sindikatën e Policisë së Kantonit të Sarajevës, me ftesë të kësaj të fundit. Në këtë vizitë mori pjesë një delegacion i kryesisë ekzekutive të SPK-së, i përbërë nga Kryetari Avdi Hoti, Nënkryetarja Edita Azemi, si dhe bashkëpunëtorët tanë: Kryetarja e Sindikatës së Drejtorisë Rajonale të Prishtinës dhe Koordinatori i përgjithshëm i SPK-së.
Delegacioni u prit ngrohtësisht nga Kryetari i Sindikatës së Kantonit të Sarajevës, z. Saim Smajlović, me të cilin zhvilluam një takim përmbajtësor dhe miqësor, që shënoi fillimin e një bashkëpunimi të ndërsjellë sindikal ndërmjet dy organizatave tona.
Temë qendrore e diskutimeve ishte kontrata kolektive sektoriale, e cila tashmë është funksionale në këtë kanton dhe përbën një model frymëzues edhe për ne, pasi Sindikata e Policisë së Kosovës ndodhet në fazat përgatitore për të nisur procesin e hartimit të një kontrate të tillë.
Aktivitetet u përmbyllën me lojëra sportive tradicionale, të cilat pasqyruan më së miri shpirtin e solidaritetit, bashkëpunimit dhe përkushtimit sindikal.
Kjo vizitë përbën një hap të rëndësishëm drejt forcimit të lidhjeve rajonale dhe ndarjes së përvojave ndërmjet sindikatave të policisë, gjithnjë në funksion të përmirësimit të kushteve të punës dhe avancimit të të drejtave të punonjësve të sigurisë.
